100 ani bandiera ladina

100 ani bandiera ladina 💙⬜️💚

💙Brum sciche l ciel. Ti mbincion plu lidëza a duc chëi che ie sotmetui 🌬. Ve mbincion pazienza y na forza sciche l'ega, che geva bel plan ora l sas 💦🌊 ⬜️Blanch sciche i crëps y la nëif. Ve mbincion pesc 🕊, inuvazion y aria frëscia 💨 💚 Vërt sciche i prei. Ve mbincion fertuna 🍀, speranza 🌱 y de pudëi se goder mo giut alalongia nosc bel ambient dla Dolomites🌲🌳🎋🌱. Per arjonjer dut chësc ve mbincions truepa lumes vërdes🚦 y dezijions drëtes per l daunì ✅

Chësc ve mbincions per l daunì, ma śën ulons cialé n pue' dereviers ai ultimi 100 ani, canche n valguna jënt ladina se à ancuntà cun l spirt y i valores descric tlo dessëura: Ai 5 de mei dl 1920, avisa dan 100 ani, se à ancuntà sun l Jëuf de Frea setanta reprejentanc dla cin‘ valedes ladines Gherdëina, Val Badia, Fascia, Fedom y Ampëz. L fova ntlëuta na gran protesta pervia dl „Tratat de Saint-Germain“ cun chël che l ie unì fat ora che dut l Tirol y la cin‘ valedes ladines ova da passé ala Talia. I reprejentanc ladins ti à damandà al Rëni dla Talia de pudëi eserzité l prinzip der autodeterminazion y che l popul ladin sibe recunesciù coche na grupa etnica a pert, ajache l ne n’ie no talian no tudësch. Te chësta ucajion iel unì metù ora per l prim iede la bandiera ladina. 💙⬜️💚 Nosta bela bandiera à n gran senificat storich, identiter y politich. La reprejënta mo al didancuei l prinzip de autodeterminazion de n popul y l dejidere de nosta cumenanza de cunservé nosta cultura, nosta rujeneda y nosta identità. La bandiera simbolisea nce la ulentà de avëi n’unità de duta la valedes ladines dal pont de ududa aministratif, do la tripartizion fascista dl 1923. L ie da se mbincé che duta la cin‘ valedes ladines posse sentì deplù la lidëza che n sënt a ti cialé al bel ciel brum dla bandiera. 💙⬜️💚

Live sun Radio Cortina: https://www.radiocortina.it/live/ Inn ladin sun youtube: https://www.youtube.com/watch?v=94X9vKtGMSY